Ֆյոդոր Սվարովսկի. Ինձ ասացին

Ֆյոդոր Սվարովսկի (1971 Մոսկվա)

Ինձ ասացին,
որ դու դեռ սիրում ես ինձ

որ զանգում ես
երբ տանը չեմ

կարդում ես իմ սիրելի գրքերը
որ ներքուստ ավելի մոտ լինես

հետևում ես ինձ ամեն քայլափոխին՝
գրասենյակ և խանութ
ծանոթների մոտ

Ասում են՝ քեզ նույնիսկ տեսել են ինձ հետ
գարնանը
զբոսախնջույքին
քաղաքից դուրս
ու նույնիսկ անշարժ գույքի կոնֆերենցին Փարիզում

և այս ամենը 
ի հակառակ այն փաստի,
որ մենք իրար հետ գրեթե չենք խոսել

և հայտնի պատճառներով
ես մոտ ապագայում քեզ, ինչպես թվում է ինձ, չեմ տեսնի

ուզում ես իմանալ ինչու

որովհետև Ռիգայի թաց ճանապարհին
դու մասնատվեցիր, ջարդվեցիր, լղոզվեցիր
և միանման մեկ ամբողջ զանգված դարձան 
մազերդ, միսդ, ոսկորներդ
ինչ-որ ճարպամաս անգամ
առանձին փռված գլուխդ

որովհետև ես ներկա էի թաղմանը
որպես կարգ
գնում էի ծաղիկներ

որովհետև արդեն երկու տարի է
դու մահացած ես
բայց
գուցե, այնուամենայնիվ, դա ճիշտ է

որովհետև ինչ-որ տարօրինակ
խոտաբույսերի բույր է
գալիս լոգարանից 

վաղ առավոտյան
ես երբեմն մտնում եմ խոհանոց

այնտեղ
հանկարծ
լվացած են բոլոր ափսեները
և ծխած է
և կերել են ամբողջ հալվան...

Թարգմանությունը՝ Մարգարետ Ասլանյանի