Նազիմ Հիքմետ Ռան
(1902-1963 Թուրքիա)
Ապրել
Խորհում է Տարանտա Բաբուն.
մարդու սիրտը,
գլուխն ու ձեռքը`
հայտնագործելով
ընդերքը երկրի,
կրակե աչքերով
աստվածներ են ստեղծել`
այնքա՜ն պողպատե,
որոնք հարվածով
լոկ մի բռունցքի
կարող են երկիրը ճզմել:
Այն ծառը, որ նուռ է տալիս
տարին մեկ անգամ`
հազարապատիկ
ավել կարող է և տալ:
Մեր այս աշխարհը`
գեղեցիկ այնքա՜ն,
այնպե՜ս ահռելի,
ու ծովափները`
լայնարձակ այնքա՜ն,
որ ամեն գիշեր
բոլորս կարող ենք
Ոսկե ավազին
շարվել կողք-կողքի`
աստղաջրերի
մասին երգելով:
Ի՜նչ լավ է ապրել,
Տարանտա Բաբու',
ապրելն ի՜նչ լավ է`
ըմբռնելով աշխարհն
ինչպես գիրք,
որպես սիրերգ
այն զգալով,
զարմանալով
մանկան պես,
ապրել`
յուրաքանչյուրս
առանձին
ու բոլորս միասին,
ինչպես գործում են
մետաքսե կտորը,
ապրել`
ուրախությանը
խմբովի երգելով
երգեր:
Ապրել, և, սակայն
ի՜նչ տարօրինակ է,
Տարանտա Բաբու',
ի՜նչ արտասովոր
պատմություն է սա,
որ այդ` անհավատալիորեն
սքանչելի և աննկարագրելիորեն
ցնծալի բանն` ապրելը,
ծանր է այսչա՜փ ...
Թարգմանությունը` Մարգարետ Ասլանյանի
Комментариев нет:
Отправить комментарий