Ասիա Ջեբար

Ասիա Ջեբար

 ( 1936-2015 ) 

Ամեն առավոտ 

Ես փնտրում եմ քեզ

Երկու քայլ այն կողմ մեր տանից`

Մեռյալների մեջ,

Ամեն գիշեր

Մթությունը

Ավելի ու ավելի է այլանդակում մարմինները -

Երկու քայլ այն կողմ մեր տանից`

Թփերում դափնու:

Ինձ ասում են`

Թե ժանդարմները տարել են մարդուն`

Նա այլևս չկա:

Ամեն առավոտ ես փնտրում եմ քեզ

Դիերի մեջ:

Ես փնտրում եմ: Ես մենակ եմ առավոտներում:

Ինձ հետ լռում է արյունող վերքով

Այգը բազմադեմ

Ու բոսորաշիթ,

Եվ համրությունը լոկ լռությունն է 

Քո հեռացումի` անհայտ, անժամկետ:

Ես փնտրում եմ` հուսալով գտնել քեզ

Անըմբռնելի ինչ-որ առավոտ,

Ես հավատում եմ` կհանդիպեմ քեզ

Մացառուտներում դափնու:

Ինձ ասում են`

Եթե մարդու կենդանի արյունը

Տրոփում է սրտում ընկերների,

Որոնց նա գուցե չի էլ ճանաչել`

Այդպիսի մարդը երբեք չի մեռնի:

Ամեն առավոտ 

Ես փնտրում եմ քեզ 

Դիերի մեջ,

Ամեն առավոտ

Մեռյալները նայում են ինձ

Լայնաբաց աչքով,

Ամեն մի աչքը իբրև մի արև,

Որ տրորված է, թաղված է հողում:

Ես փնտրում եմ քեզ,

Ես քեզ ուզում եմ ցույց տալ

Այն, ինչ ցանել ենք

Դաշտում մեր վաղվա:

Ես քեզ սպասում եմ, քեզ կճանաչեմ

Մացառուտներում դափնու:

Եվ ես ասում եմ`

Թող շուտ այրվի հուսահատությունը:

Կյանքը, տաք երկինքը, հովիտը տառապանքների -

Ամեն բան տեղավորվել է իմ մեջ:

Քո պտղաբեր արյունը 

Ներծծել է դաշտը գալիքի:

Ամեն առավոտ 

Երկու քայլ այն կողմ մեր տանից

Ես փնտրում եմ քեզ դիերի մեջ:

*** 

Ինձ կմնա մայրամուտը բոլոր անցած փոթորիկներից հետո:

Կյանքի պտտահողմում կկորչեն տառապանքները,

Կչորանան մորմոքների մացառուտները,

Արևը միշտ կախաղանված կլինի երկնքին,

Մարդիկ, ովքեր ցերեկը գիշերեցին իմ սև մաշկին`

Կարտասվեն վերջին աշունը փեշին սպիտակ ծովահարսների,

Ես` կմնամ գաղտնի երգը, վերջին սերը բորբ մայրամուտի,

Որովհետև ես Աստծո զայրույթից ծնված կինն եմ`

հրկիզված երկնքից երկիր ընկած մոխրի մի փոշեհատիկը,

Ամենասև բիծը անհնարինորեն սպիտակ խղճին 

Ձանձրալիորեն հնարավոր աշխարհի:

Թարգմանությունը` Մարգարետ Ասլանյանի