Գիթի Խոշդել
Ծաղիկներով օծիր մարմինս`
Ես ուզում եմ զգալ ինձ հող...
***
Աշխարհին իջած
Ամենատխուր գիշերն է այսօր.
Դու վերադառնում ես տուն,
Ուր քեզ չեմ սպասում...
***
Դու կգտնես մազափունջս
քո ճերմակ բարձին,
Ես կապրեմ ճաղատ օրերս`
մենության գլխին...
***
Այդ կինը, ում դու նվիրեցիր կյանքդ`
Կտեղավորի մարմինդ դագաղում
Եվ կմաքրի ոտքերը այն հողի վրա,
Որ պիտի շաղ տան քո շիրմափոսին:
Այն տղամարդը, ում նվիրեցի կյանքս`
Այդպես էլ չսովորեց ճիշտ մեռնել...
***
Մարի'ր լույսը`
Խավարում այն կատարյալ է:
***
Մտապահիր իմ ձեռքերը,
որ կարողանաս զգալ
անմեղությունս,
երբ քեզ սպանողը
ես չեմ լինի...
***
Չե'մ վախենում մահից,
Ժամանակը` վայրի
Մանուշակների պես,
Քո մատների արանքում
Ծլարձակեց. դու ինձ
քաղում ես պարտեզից:
Չե'մ վախենում մահից.
Ինձ բավական է
Մեկ օրվա կյանքը
Քո ծաղկամանում...
***
Քո մասին հեքիաթները
Պատմում էի գետին,
Հազար սիրտ քիչ էր`
Գիշերվա մարմինը
Շոյելու համար ...
Լուսաբացին ես հաց էի թխում,
Մայրամուտին`
Երկնային բանաստեղծությունները
Գրում էի կոկոսի տերևին,
Որ մենությունս լեփլեցուն դառնա...
***
Հուր բարձրացավ,
Մթությունն այրվեց...
Ես լույսից անունդ հարցրի`
Արտը ցույց տվեց...
Ու տեսա.
Վերցնելով գետնից
Ամեն մասնիկ`
Դառնում է արև,
Եվ ամեն քայլդ
Մի նոր բանաստեղծություն`
Կակաչների կրծքին:
***
Ուր էլ նայես աստղ է ծաղկում
Թե ձեռքերս տաքացնի
Շապիկիդ արևն`
Ամեն մի բառը կլինի թռչուն`
Ճախրանքում:
Քեզանից բացի ոչ ոք չգիտի,
Թե մինչև ո՞ր բարձունք
Կձգվի թռիչքս...
Ես միահյուսում եմ լռությունները`
Որպես ձկնորսության ուռկան,
Սակայն ծովի երկայնքով:
Երկրե-երկիր,
Լուսնից-լուսին,
Արեգակից-արեգակ`
Ուր էլ նայես աստղ է ծաղկում,
Եվ բոլոր անձրևները
Վերածվում են մարգարիտների:
Աչքերս փակում եմ` ուղվելով
Դեպի կամքը քո,
Դեպի այն մարմինը, որ հյուսել եմ
Այս մարմնի շուրջ`
Գրոհելով բջիջներին ճակատագրիս,
Որ ինքս իմ մեջ ես տարրալուծվեմ...
Թարգմանությունը` Մարգարետ Ասլանյանի
Комментариев нет:
Отправить комментарий