Սեսիլիա Գանդի

Սեսիլիա Գանդի

Ներս արի:

Փակ դուռը դատավճիռ չէ`

Ես չեղարկում եմ հիասթափությունը:

Աչքերդ թաղել ես հոգսերում օրվա

Եվ չես նկատում` ինչպես եմ մեռնում

Անկիրք հայացքում քո:

Ես քեզ ներել եմ` վստահ քայլերով

Հրաժեշտներդ պարտադրված,

Ես քեզ ներում եմ, որ այսօր գալիս

Արդեն մտածում ես` ո՞նց պիտի գնաս,

Եվ ինչ խոսքերով համոզես դու քեզ,

Թե դեռ կա հեքիաթ` աչքերում ուրիշ:

Ներս արի:

Սահեցրու մատներդ 

Ծաղկաթերթերին իմ պարանոցի,

Շոշափիր կրծքիս ընկած արևը,

Խմիր գիշերը իմ քնքուշ ձեռքից,

Չեմ ուզում տեսնել` ինչպես ես մեռնում

Վառվող հայացքում իմ:

Ես չեղարկում եմ տառապանքները,

Ես քեզ սիրում եմ այն հեքիաթներով,

Որ չկան ոչ մի աչքերում ուրիշ:

Թարգմանությունը՝ Մարգարետ Ասլանյանի